ԵՄ-ն աջակցում է Հայաստանի «Խաղաղության խաչմերուկ» նախաձեռնությանը

2026-03-16

ԵՄ-ն վճռականորեն հանձնառու է ամրապնդել իր համագործակցությունը Հայաստանի հետ։ Այս մասին հայտարարել է Եվրոպական հանձնաժողովի ներքին գործերի և միգրացիայի հարցերով հանձնակատար Մագնուս Բրունները «Արմենպրես»-ին տված բացառիկ հարցազրույցում։

 

«Իմ առաջին այցը Հայաստան, և վստահ եմ՝ ոչ վերջինը, տեղի է ունենում 2026 թվականի մայիսին նախատեսված Հայաստան-ԵՄ առաջին գագաթնաժողովից առաջ։ Սա ընդգծում է ԵՄ-ի վճռականությունը ամրապնդելու համագործակցությունը Հայաստանի հետ և վերահաստատում մեր հանձնառությունը Հարավային Կովկասում խաղաղության, կայունության և տարածաշրջանային համագործակցության խթանմանը։ Դրա կարևոր բաղադրիչներից մեկը Հայաստանի և Ադրբեջանի միջև խաղաղության գործընթացում գրանցված առաջընթացն է։ ԵՄ-ն պատրաստ է շարունակել աջակցել այս ջանքերին, այդ թվում՝ ներդրումներ կատարելով տարածաշրջանային կապերում՝ համաձայն Հայաստանի «Խաղաղության խաչմերուկ» նախաձեռնության», - ասել է Բրունները։

Համագործակցությունը զարգանում է նաև գործնական տնտեսական ոլորտներում։ ԵՄ-ն և Հայաստանը համաձայնել են 270 միլիոն եվրո տրամադրել իրականացվող աճի ծրագրին աջակցելու համար, որը աջակցում է բարեփոխումներին և նպաստում է Հայաստանի տնտեսության և կայունության ամրապնդմանը։

 

«Գլոբալ դարպասի նախաձեռնության շրջանակներում մենք նաև ուսումնասիրում ենք լրացուցիչ ներդրումային հնարավորություններ տարածաշրջանային կապի, տնտեսական դիվերսիֆիկացիայի, թվային և կանաչ վերափոխումների, էներգետիկ անվտանգության և կլիմայական համագործակցության ոլորտներում։ Միևնույն ժամանակ, մենք աշխատում ենք ընդլայնել Հայաստանի առևտրային հնարավորությունները և օգնել հայկական բիզնեսներին ավելի լավ օգտվել մոտ 450 միլիոն սպառող ունեցող ԵՄ շուկա մուտք գործելուց։ Սա կարող է նոր հնարավորություններ բացել հայկական արտահանման, ներդրումների և տնտեսական աճի համար», - ընդգծեց եվրահանձնակատարը։

 

ge.armradio.am