Հայաստանի ներկայացուցչությունը Ասիա-Խաղաղօվկիանոսյան հանձնաժողովի աշխատանքներում

2025-04-22

Ապրիլի 21-ին, Բանգկոկում կայացած ՄԱԿ-ի Ասիայի և Խաղաղօվկիանոսյան տարածաշրջանի տնտեսական և սոցիալական հանձնաժողովի (UNESCAP) 81-րդ նստաշրջանի ընթացքում, ՀՀ արտաքին գործերի փոխնախարար Ռոբերտ Աբիսողոմոնյանը մասնակցել և ելույթ է ունեցել «Ասիայի և Խաղաղօվկիանոսյան տարածաշրջանում ներառական և կայուն զարգացման համար արդիական և զարգացող քաղաքականության հարցեր» խորագրով ընդհանուր քննարկմանը։

Իր ելույթում արտաքին գործերի փոխնախարար Ռոբերտ Աբիսողոմոնյանը նշեց, որ հանդիպումը լավ հնարավորություն է կարծիքներ փոխանակելու Կայուն զարգացման նպատակների (ԿԶՆ) իրականացման ուղղությամբ արձանագրված առաջընթացի, առկա մարտահրավերների և ապագա քայլերի վերաբերյալ։

Արտաքին գործերի նախարարի տեղակալը կարևորեց Հայաստանի և UNESCAP-ի միջև հաստատված համագործակցությունը կանաչ տնտեսության խթանման, շրջակա միջավայրի պաշտպանության, մարդկային կապիտալի զարգացման և կապակցվածության ոլորտներում։

Նա հատկապես կարևորեց 2026 թվականի COP17 կենսաբազմազանության համաժողովի անցկացումը Երևանում՝ որպես կենսաբազմազանության և կլիմայի փոփոխության հարցերով համագործակցության կարևոր հարթակ։ Ընդգծվեց, որ Հայաստանը՝ որպես համաժողովի հյուրընկալող երկիր, որդեգրել է ներառական մոտեցում՝ քաղաքացիական հասարակության, միջազգային կազմակերպությունների և բոլոր մյուս շահագրգիռ կողմերի ներգրավվածությունն ապահովելու համար։

Հայաստանի կողմից ընդունված խաղաղության օրակարգի վերաբերյալ փոխարտգործնախարարը մասնակիցներին ներկայացրեց Հայաստանի կառավարության «Խաղաղության խաչմերուկ» հայեցակարգը և ընդգծեց դրա ներուժը՝ որպես տնտեսական կապակցվածության ապահովման և խաղաղության հաստատման կարևոր երաշխիք՝ թե՛ Հարավային Կովկասում, թե՛ դրանից դուրս։

ge.armradio.am