Մետաքսե ճանապարհի դայջեստ | 17 Հոկտեմբեր 2026

2026-10-17

 

Ֆրանսիա-Վրաստան տնտեսական գործընկերություն

 

Վրաստանում Ֆրանսիայի դեսպան Օլիվիե Կուրտոն Business Insider Georgia-ի հետ զրուցում է երկու երկրների միջև տնտեսական հարաբերությունների դինամիկայի և համագործակցության ապագա հեռանկարների մասին: Նրա խոսքով՝ 2025 թվականին երկկողմ առևտրաշրջանառությունը կազմել է 313 միլիոն եվրո, չնայած ֆրանսիական նոր ներդրումների ներգրավումը շարունակում է մնալ մարտահրավեր: Դեսպանը Վրաստանի նկատմամբ ֆրանսիական ընկերությունների հետաքրքրությունը բացատրում է Վրաստանի ռազմավարական դիրքով և Միջին միջանցքի ներուժով, չնայած նշում է, որ մի շարք ընկերություններ սպասողական վիճակում են ներդրումային որոշումներ կայացնելիս: Համագործակցության կարևոր ոլորտներ են նշվում տրանսպորտային և լոգիստիկ ենթակառուցվածքները, էներգետիկան, ջրամատակարարումը, թափոնների կառավարումը և գյուղատնտեսությունը: Հարցազրույցում նաև քննարկվում է ֆրանսիական ընկերությունների հնարավոր մասնակցությունը Վազիանի օդանավակայանին, Վրացական երկաթուղու հզորությունների ընդլայնմանը և Սև ծովի ստորջրյա մալուխային նախագծերին: Դեսպանի խոսքով՝ գործարար միջավայրի նկատմամբ վստահության ամրապնդումը և երկրների միջև համագործակցության զարգացումը կնպաստեն տնտեսական գործընկերության խորացմանը:

 

Վրաստան-Ուզբեկստան առևտրային հարաբերություններ

 

Վրաստանը և Ուզբեկստանը քննարկել են առևտրատնտեսական հարաբերությունների խորացման և ներդրումների խթանման հարցերը Տնտեսական համագործակցության միջկառավարական հանձնաժողովի 11-րդ նիստում: Կողմերը որպես առաջնահերթություն նշել են երկրների միջև առևտրի աճը և մոտ ապագայում առևտրաշրջանառության ծավալի 1 միլիարդ դոլարի հասցնելը, հատուկ ուշադրություն դարձնելով տրանսպորտի և լոգիստիկայի ոլորտին, այդ թվում՝ Անակլիայի խորջրյա նավահանգստի դերին և Միջին միջանցքի զարգացմանը:

 

Սևծովյան նավերի ապահովագրությունը թանգացել  է

 

Սև ծովում նավթատար նավերի ապահովագրության արժեքը 200,000 դոլարից բարձրացել է մինչև 2.5 միլիոն դոլար, ինչը մեծացնում է նավթի փոխադրման ծախսերի և վառելիքի գների վրա ճնշումը: Գնի բարձրացումը կապված է ծովային անվտանգության ռիսկերի աճի հետ: Հոկտեմբերի 6-ին Բուլղարիայի բացառիկ տնտեսական գոտում հարձակումների հետևանքով մեկ նավ խորտակվեց, իսկ մյուսը վնասվեց: Բացի այդ, նավերի ապահովագրության վճարները երկու շաբաթվա ընթացքում իրենց արժեքի 0.1%-ից բարձրացել են մինչև 0.5% և կարող են հասնել 1%-ի:

 

Վրաստանը՝ Միջին միջանցքի զարգացման մասին

 

Վրաստանը պատրաստ է համագործակցել Ղազախստանի և այլ գործընկերների հետ, որպեսզի Միջին միջանցքը գործի որպես միասնական, արդյունավետ և մրցունակ տրանսպորտային համակարգ: Այս մասին Աստանայում Տրանսկասպյան միջազգային տրանսպորտային երթուղու անդամ պետությունների տրանսպորտի նախարարների հանդիպման ժամանակ հայտարարել է էկոնոմիկայի և կայուն զարգացման փոխնախարար Թամար Իոսելիանին: Նրա խոսքով, միջանցքի ներուժը լիարժեքորեն իրացնելու համար կարևոր է համակարգել ենթակառուցվածքային ներդրումները, բարելավել հզորությունները և ամրապնդել երկրների միջև համագործակցությունը, ինչը կնպաստի տարածաշրջանային առևտրին և կներգրավի ներդրումներ:

 

Նախիջևանում շարունակվում է երկաթուղու վերակառուցումը

 

Ադրբեջանը շարունակում է վերակառուցել Նախիջևանի 194 կմ երկարությամբ երկաթուղային գիծը, մինչդեռ Հայաստանը քննարկում է Նախիջևանի սահմանի երկայնքով երկաթուղու վերականգնումը և Կապանի ու Մեղրիի հետ կապի զարգացումը: Բացի այդ, Հայաստանի կառավարությունը ստեղծել է աշխատանքային խումբ՝ «Ռուսական երկաթուղիներ» ընկերության հետ 30-ամյա կոնցեսիոն պայմանագրի պայմանները վերանայելու համար, որը կապված է նաև երկրի երկաթուղային ենթակառուցվածքների վիճակի հետ:

 

Փոթի նավահանգստի ընդլայնումը սպասում է որոշման

 

Փոթի նավահանգստի 300 միլիոն դոլար արժողությամբ ընդլայնման նախագծի տեխնիկական հարցերը գրեթե համաձայնեցված են, սակայն վերջնական որոշում դեռևս չի կայացվել: APM Terminals Poti-ի վարչակազմի ղեկավար Զվիադ Չխարտիշվիլիի խոսքով՝ տարեվերջին Էկոնոմիկայի նախարարության հետ բանակցությունները կվերսկսվեն: Զուգահեռաբար, մաքսային և սահմանային ընթացակարգերի կրճատման աշխատանքները ծառայում են նավահանգստի թողունակության ավելացմանը:

 

TRACECA-ն և Բուլղարիան զարգացնում են Սև ծովի լոգիստիկ կապերը

 

Հոկտեմբերի 5-6-ը TRACECA-ի գլխավոր քարտուղար Ջասուրբեկ Չորիևը հանդիպեց Բուլղարիայի տրանսպորտի և կապի նախարար Գիորգի Պեևի և Սոֆիայի, Բուրգասի և Վառնայի համապատասխան գերատեսչությունների ղեկավարների հետ: Հանդիպումների ժամանակ քննարկվեցին Վառնայի և Բուրգասի խորջրյա նավահանգիստների արդիականացումը, Թուրքիա տանող ճանապարհային և երկաթուղային ենթակառուցվածքների հզորության կրկնապատկումը, թույլտվությունների քվոտաները, թվայնացումը և Վառնայի լաստանավային կապի զարգացումը:

 

TRACECA.GE

 

Աղբյուրներ՝
businessinsider.ge / businessinsider.ge
commersant.ge / businessinsider.ge
commersant.ge / bm.ge / traceca-org.org