ირანი აზერბაიჯანსა და საქართველოს TRACECA-ს ფარგლებში სატრანზიტო დერეფნის შექმნას სთავაზობს

როგორც ABC.AZ Report-ზე დაყრდნობით იუწყება, ამის შესახებ ირანის გზებისა და ურბანული განვითარების მინისტრის მრჩეველმა, ამინ ტარაფომ განაცხადა.

ა. ტარაფომ აღნიშნა, რომ ინიციატივა ირანის გზებისა და ურბანული განვითარების მინისტრის, ფარზანა სადიკის, აზერბაიჯანში ბოლო ვიზიტის დროს გაცხადდა და ოფიციალური პირების მხრიდან მოწონება დაიმსახურა.

მისი თქმით, წელს ირანის გზებისა და ურბანული განვითარების მინისტრი TRACECA IPC-ს უხელმძღვანელებს.

გარდა ამისა, ა. ტარაფომ ხაზგასმით აღნიშნა, რომ ირანსა და თურქმენეთს შორის შესაძლებელია „საგზაო რუკის“ შესახებ შეთანხმების დადება, რაც ტრანზიტული გადაზიდვების მოცულობის წელიწადში 20 მილიონ ტონამდე გაზრდას გულისხმობს.

„დოკუმენტის ხელმოწერა მოსალოდნელია ირანსა და თურქმენეთს შორის ეკონომიკური თანამშრომლობის ერთობლივი კომისიის შეხვედრის ფარგლებში, რომელიც 17-19 მაისს გაიმართება“ - განაცხადა მან.

მრჩეველმა ასევე აღნიშნა, რომ 2025 წლის 21 მარტიდან 2026 წლის 20 მარტამდე (ირანული კალენდრის მიხედვით) დაგეგმილია 3 მილიონი ტონა ტვირთის გადაზიდვა ჩრდილოეთ-სამხრეთის დერეფნის აღმოსავლეთ მიმართულებით, რომელიც ირანის ტერიტორიაზე გადის.

გავიხსენოთ, რომ TRACECA არის საერთაშორისოდ აღიარებული პროგრამა, რომელიც მიზნად ისახავს შავი ზღვის აუზის, სამხრეთ კავკასიისა და ცენტრალური აზიის რეგიონებში ეკონომიკური ურთიერთობების, ვაჭრობისა და სატრანსპორტო კომუნიკაციების განვითარებას, ყველა მონაწილე ქვეყნის პოლიტიკურ ნებასა და საერთო მისწრაფებებზე დაფუძნებული აქტიური ქმედებების წყალობით.

დღესდღეობით, TRACECA-ს საერთაშორისო სატრანსპორტო დერეფანი მოიცავს ევროპა-კავკასია-აზიის დერეფნის განვითარების საერთაშორისო ტრანსპორტის შესახებ ძირითადი მრავალმხრივი შეთანხმების (BMA TRACECA) მონაწილე 14 ქვეყნის სატრანსპორტო სისტემას: აზერბაიჯანი, სომხეთი, ბულგარეთი, საქართველო, ირანი, ყაზახეთი, ყირგიზეთი, მოლდოვა, რუმინეთი, ტაჯიკეთი, თურქმენეთი, თურქეთი, უკრაინა, უზბეკეთი.

ინფო: abc.az