News
აუცილებელია დაჩქარებული ტემპით ბაქო-თბილისი-ყარსის რკინიგზის ექსპლუატაციაში გაშვება
2026-04-22
სატრანსპორტო დერეფნის კვლევის ცენტრის შეფასებით, აუცილებელია დაჩქარებული ტემპით ბაქო-თბილისი-ყარსის რკინიგზის მონაკვეთის ექსპლუატაციაში შეყვანა.
„მიუხედავად საქართველოს მთავრობის მრავალი დაპირებისა, 2017 წელს ოფიციალურად გახსნილი რკინიგზა ჯერ კიდევ სატესტო რეჟიმში ფუნქციონირებს და გაზრდილი ტვირთნაკადების მისაღებად მზად არ არის“, - აცხადებენ სატრანსპორტო დერეფნის კვლევის ცენტრში, სადაც მიაჩნიათ, რომ ამ დრომდე რკინიგზის სატესტო რეჟიმში მუშაობა გამოუყენებელი პოტენციალია.
"უზბეკეთმა მიიღო გადაწყვეტილება, 1.2 მილიონი ტონა ტვირთი, რომელიც მანამდე ირანის გავლით გადაჰქონდა, „შუა დერეფანში“ გადმოამისამართოს. ამ ტვირთის მთავარი დანიშნულების ადგილი თურქეთია, რისთვისაც ბაქო-თბილისი-ყარსის მარშრუტი იდეალური ალტერნატივა იქნებოდა“, - განაცხადა BMGTV-ის გადაცემა „წერტილში“ სატრანსპორტო დერეფნის კვლევის ცენტრის ხელმძღვანელმა.
რატომ მუშაობს ოფიციალურად 2017 წელს გახსნილი ბაქო-თბილისი-ყარსის რკინიგზა დღემდე სატესტო რეჟიმში? - ვკითხეთ პაატა ცაგარეიშვილს, რაზედაც მან განაცხადა, რომ პრობლემურ ნაწილს საქართველოს მონაკვეთი ანუ მარაბდა-კარწახის უბანი წარმოადგენს, რომელიც დაუსრულებელია.
მისივე ინფორმაციით, ქართულ მონაკვეთზე გასამართია კრიტიკული ინფრასტრუქტურა: სასიგნალო სისტემები (მატარებლების შეუფერხებელი მოძრაობისთვის); ენერგომომარაგების ქსელი და ასევე, გადასატვირთი ტერმინალები და კომპლექსები.
პაატა ცაგარეიშვილმა დაუსრულებელ ბაქო-თბილისი-ყარსის რკინიზგაზე საუბრისას, პარალელი საგზაო ინფრასტრუქტურის მშენებლობის ტემპთან გაავლო და აღნიშნა, რომ სახელმწიფოს არ აქვს მსგავსი მასშტაბური და ფინანსურად ტევადი პროექტების მართვის საკმარისი გამოცდილება, რის გამოც ვადები მუდმივად იწევს.
ცნობისთვის: 2025 წლის ბოლოს ეკონომიკის მინისტრი მარიამ ქვრივიშვილი აცხადებდა, რომ“ბაქო-თბილისი-ყარსის” რკინიგზა უახლოეს პერიოდში გაიხსნებოდა, მაგრამ ვადები არ დაუკონკრეტებია. ეკონომიკის მინისტრი შარშან ბაქო-თბილისი-ყარსის რკინიგზის საკოორდინაციო საბჭოს თავმჯდომარის პოსტზეც დაინიშნა.
შეგახსენებთ: ბაქო-თბილისი-ყარსის სარკინიგზო მაგისტრალი 2017 წლის 30 ოქტომბერს ამოქმედდა. პროექტის ფარგლებში აშენდა ყარსი-ახალქალაქის 98 კმ-იანი რკინიგზა, რომლის 68 კმ თურქეთის ტერიტორიაზეა, 30 კმ კი საქართველოს ტერიტორიაზე. ამავე პროექტით საქართველოში ახალქალაქი-თბილისის 183 კმ-იანი სარკინიგზო მონაკვეთის რეკონსტრუქცია მოხდა. ბაქო-თბილისი-ყარსის სარკინიგზო მაგისტრალის საერთო სიგრძე 827 კმ-ია, თუმცა 2017 წლიდან რკინიგზა მხოლოდ სატესტო რეჟიმში ოპერირებს.